السيسي: قضية الغارمات تشغلني منذ 9 سنوات.. وتطبيق توثيق الطلاق حاليا
قال الرئيس عبدالفتاح السيسي، إن قضية الغارمات كانت تشغله منذ ان كان وزيرا للدفاع، وتحديدا منذ 8 أو 9 سنوات، موضحًا: "الموضوع ده عبارة عن أم راحت تجيب فلوس عشان تشتغل أو تعمل وبعدين منجحتش او تجهز بنتها ومقدرتش تسدد او تدفع".
وأضاف رئيس الجمهورية، في كلمته خلال احتفالية المرأة المصرية والأم المثالية لعام 2023: "اتعملت منظومة في الموضوع ده مؤذية، الدولة الحديثة هي دولة تنظل لكل المشكلات وتعملها آليات حل تبقى منظومة عمل مش وجهات نظر، مش جمعية أو حد يقوم بدور خيري فقط، لكن الدولة تعمل فكرة تحل بها المسألة".
وتابع: "بالنسبة لصندوق دعم الأسرة، فأنا أتمنى إن مفيش أي بيت يتهد أبدا او تنفصل أسرة، ولكن هذا الأمر وارد، وأتمنى من السيد وزير العدل يطمئنكم إن الانطباع عن حجم الطلاق في مصر مش زي الحقيقة، الكلام اللي بقوله علمي، لدينا إحصائيات كاملة ودقيقة على مدار عشرات السنوات".
وواصل: "قلت منذ سنوات عاوزين نعمل توثيق للطلاق، وساعتها حصل نقاش كبير، وقلت إن ده امر مهم جدا، طب ليه نعمله دلوقتي؟ عمرنا ما هنعمل إجراء يخالف شرعنا، لكن مفيش ضبط للكلام، وفي النهاية لما أعمل قانون إن الطلاق هو الطلاق الذي يتم بشكل موثق، لو فيه ذنب مين هيشيله؟! الأمر يتم مناقشته في البرلمان من كل الناس، ولكن في النهاية هناك ضرر وهناك الاكثر ضررا، يبقى انت تشيل الأكثر ضررا حتى لو كان بضرر وهذه قواعد فقهية".
